Lolotte

Auteur : Jacques Bertrand

 

Pour consulter une brève biographie de Jacques Bertrand, auteur et compositeur d'origine carolo, consultez la page "Pays de Charleroi".

Su l'bôrd dè Sambe, èt pièrdu dins l'fuméye,

Wèyéz Couyèt avè s'clotchî crawyeû ?

C'est là qu'dèmeure èm'matante Dorotéye,

Veûve dè m'mon-onke Andriyin du Crosteû.

A s'neuve méso, nos avons fét ribote,

Diminche passè, tout en pindant l'crama.

Pou l'preumî coûp, c'est là qu'dj'é vu Lolotte.

Rén qu'd'i pinser, sintèz come èm'coeûr bat. (bis)

 

Gn-avèt drola les pus guéy's du vilâdje.

En fét d'couméres, on n'avèt qu'a chwèsi.

On a r'cinè, a l'ombe, pa d'zous l'fouyâdje,

Dèvant l'méso, dèlé l'gros cèréjî.

Em'boune matante a dèl biêre en boutêye.

C'n'est nén l'fârô qu'est jamés si bon qu'ça.

Dins s'chique, Lolotte èstèt si bén vèrmêye,

Qu'rén d'i pinser, sintèz come èm'coeûr bat. (bis)

 

I d-alèt mieus, les panses èstant rimplîyes,

Djan l'Blanchisseû tinguèle ès'viyolon

Et dit : " Z-èfants, nos avons ci des fîyes

Qui n'dèmand'nut qu'a danser l'rigodon. "

Ah ! qué pléji ! Què Lolotte ét contène !

Après l'quadrîye, on boute ène mazurka.

Djè triyanè en prèssant s'mwin dins l'mène.

Rén qu'd'i pinser, sintèz come èm'coeûr bat. (bis)

 

V'la l'swêr vènu, pou danser chakin s'prèsse.

L'viyoloneû raclèt avec ardeûr.

L'biêre èt l'amour èm'fèyént toûner l'tièsse.

Vint noms di ch'nik ! djè nadjè dins l'boneûr.

Més l'pa Lolotte, en wèyant qu'èle m'embrasse,

D'in coûp d'chabot m'fét plondji dins l'pûria.

L'coumére ès'sauve èyèt mi, djè m'ramasse.

Ciel ! qué coûp d'pîd ! Sintèz come èm' coeûr bat. (bis)

Djè m'souvénré du crama dè m'matante.

Dj'crwè qu'dj'é l'cripèt câssè ou bén dèsmis.

Djè prind des bains al vapeûr d'eûwe boulante,

Grignant les dints à tchak coûp què dj'm'achîd.

Més quand dj'dèvrè skèter m'dérène culote,

En m'empwègnant avè s'mame èyè s'pa,

Putôt mori què d'viker sins Lolote.

Rén qu'd'i pinser, sintèz come èm'coeûr bat. (bis)